قصيدة للشاعر براك بن مروت

قصيدة قالها الشاعر المغفور له بإذن الله (براك بن ناصر بن نهار المروت) في أبناء عمومته

هات القلم واكتب على ماطرالي ,,, اكتب بقرطاس وزين كتابه

كتّاب خطي واحد من عيالي ,,, لامن ومرته قال لبيك يابه

اكتب على مادار في فكر بالي ,,, قوارع بالجوف محصي احسابه

غدالهن وسط الضمير اجتوالي ,,, لجت معاليق الحشا باضطرابه

طرش سلام على كل غالي ,,, خص الاخوان وخص كل القرابة

سلام أحلى من حليب المتالي ,,, در البكار اللي لذيذ شرابه

والـ يسألك بلغه عن حالي ,,, وقله ترى فرقى الضحى يندعابه

ياعزوتي يامحزمي ياظلالي ,,, ياسوقي اللي رابح من شرابه

من عقبكم غديت كني لحالي ,,, أبكي خفا والجوف محد درابه

يالله ياللي حاكم بالعدالي ,,, اني طلبتك يامدبر سحابه

انك تلم اللي جنوب وشمالي ,,, ياالله عساها دعوة مستجابه

تمت بذكر اللي حكم بالعدالي ,,, واعداد مافوق التراب ومشابه





.



.