بسم الله الرحمن الرحيم
قصيدتي هذي لا تحتاج الى مقدمه وهي وموجهه للبعض وليس للكل
يالله يالمعبود يارحمان علام الغيوب = ياعالمن سر العباد افرج علي همومها
ابطيت في همي وانا ماني على الشينه طروب = لاوالله الا صابرن لو زودت بسهومها
مالي عذر غير القوافي دايمن عني تنوب = ولا رفيق موالين ياقف لاجا ملزومها
وانا على درب الخوي امشي ولا احسب الدروب = خوة زحازيح الرجال اللي تعز علومها
ياصاحبي وانت السند لا قفلت من كل صوب = سود الليال اليا اقبلت محدن حسب لنجومها
ياصاحبي قولن عقيم وزايدن في كل نوب = مدري على ويش البشر ترمي علي سمومها
ماني من اللي يطلب العليا على درب محجوب = امشي على وضح النقا والمرجله وسلومها
والشعر مدهالي وانا ماني على القاف مغصوب = لاوالله الا غايتي مابيعها وسومها
وانا وقفت بماقفن يحسب عليه ومحسوب = ماهمني من عقبها سوالفن لرخومها
ياصاحبي هذا الحكي والله يجير من الذنوب = حظ الليالي طايلن واسعى ورا مقسومها
اخوكم الشاعر / محمد بن حسين الشعيل
على وضح النقا
العرض العادي
