أبيات كتبتها في ربيع أول من عام 1426هـ وهي مجاراة لقصيدة الشاعر سعد بن عبد الله الكثيري التي نشرت في جريدة الجزيرة يوم الأحد 22 ربيع الأول1426هـ العدد 11903 الصفحة الحادية عشرة تحت عنوان " مشكور يا شيخٍ لنجدٍ بناها " .. وللأسف فإن قصيدة الشاعر سعد بن عبد الله لم أجدها عندي

وأقول في هذه المجاراة :

قصيدةٍ يا سِعْد منهو قراها
سِعْد الحظيظ اللي نظم عذب الأقوال

دام الوفا لاهل الوفا محتواها
نسعَد بها لاشك في كل الأحوال

من شاعرٍ جزل المعاني عطاها
تغْني عن أبياتٍ كثيرات وجزال

أنا اشهد إنه من صميمه بناها
وعمّر بناها بين صوله وتجوال

يذكر بها نجدٍ ومنهو رعاها
اللي تغنتبه على كل موال

إلى طرى سلمان نسنس هواها
ويصيبها لاراح سلمان ولوال

ياويلها ياويلها من بلاها
حبٍ سكن بالقلب والعقل والبال

حبّت حبيبٍ حب حتى ثراها
بعذرها يوم اشغل الفكر والحال

هي مانست سلمان وهو مانساها
ياجعلها ماتفقده طيّب الفال

إلى ابتعد حنّت وهو حن وجاها
مثل الرحوم اللي مسح روس الأطفال

اللي رعاها كل وقت وحباها
جنوبها والشرق والغرب وشمال

لين اصبحت في عين منهو يراها
غندورةٍ بالطول والزين تختال

نحبّها عد النجوم بسماها
أو كثـْر فرحة طفلٍ بعيد شوّال

نعزّها ونحبها ونحماها
ونعدّل اللي فكره اليوم قد مال

وقبيلة الكثران تعلن وفاها
وتجدد عهودٍ قديمات وطوال

هذا ولانا من عفيف وقراها
وضريّة ومسكه على كل الأحوال