من إبن لعبون إلى السديري رحمهم الله

11-11-2008, 10:32 PM

من الشاعر محمد بن لعبون رحمه الله إلى الأمير أحمد بن محمد بن تركي بن محمد السديري رحمه الله

ياهل العيرات عن دار التلاف
من عفا الله عنه يردف له رديف

عن ديار ٍ كل ما فيها يعاف
يا ركب ويلاه من سيفٍ كسيف

جيت ناس عقب أهل مي نشاف
يطبخون الزاد بالماي النظيف

من عقب زل الزوالي واللحاف
والنمد والجوخ سفوا لي سفيف

شف منازل مي في ذيك الحضاف
يا حراش ان كان يحتاج تعريف

ذا مصب الماء وهذاك الرفاف
والحرم هذا وهذاك المضيف

موحشات كل ما فيها يخاف
مهرة الخيال فيها ما تقيف

يحلف الحلاف ما شافه وشاف
بالمنازل زول عطبول زريف

كم عف الله لي بربعه من مطاف
مع نزول اعطان مشتاه ومصيف

لي وليف كل هرجه بالخلاف
العجب لله دره من وليف

لاكشف لي عن ثناياه الرهاف
من رفيف البرق تلقا له رفيف

يا لطيف ٍ من حكاياه اللطاف
سمني لعيونها عبد اللطيف

كن وصف جعودها فوق الرداف
الهوا والماء من فوق الغريف

ياهل العيرات ما منهن عجاف
رابيات بنجد في هيف وريف

من جبل تيما الى حد الحقاف
من خشوم طويق لبطانة عفيف

هايتات كالمها زرق الخفاف
من بنات عمان ممشاهن خفيف

ان سمحتو ياركب ما من خلاف
وان قصر حظي فهاكم لي شريف

خط مفجوع سلامه كالرعاف
ماطره كالدر لمحب ٍ دنيف

تفتضح منه العذارى بالظراف
والزهر باللون تيجانه نظيف

بارتحاب مع تحيات نظاف
جالبات النور لعيون الكفيف

زاهيات كنهن ورد القطاف
سالمات الزيغ من قلب وليف

باندماج يا ركب لي وانعطاف
وانطراحٍ بالوطا ما قط شيف

للذي له في حشا روحي عطاف
بالوداد وبعد رسمي والطريف

ما عليكم لو على ملط الشعاف
تاصلون السير منها بالوجيف

من عزيز الما الى حد الصحاف
لو أقول بيوم ممشاكم قصيف

عامدات ٍ نجد من بعْد المساف
خاصات (الغاط) من نجد المريف

ملتجين في ذرا ستر العفاف
(أحمد ٍ) لا زال مزبان المخيف

مجمر ٍ تدعيك ناره بالكشاف
مرخص الكوما إليا غليّ الرغيف

با جتوال ٍ وانحراف ٍ وانصراف
كالسحاب الجود ما مده قصيف

صيرفي بالقيل بل صراف قاف
مستجار الدار غطريف ظريف

يا ثقيل الروز بأيام الخفاف
فيه ثقل الروز والطبع الخفيف

اشتكي لك من عيافي للعياف
من هوى طرد الجوازي نا معيف

راميات من سهام بنصراف
من غزال ٍ في فوادي له رنيف

موريات يـ (ا السديري) بالرضاف
ورية الوقاد للقدر الرهيف

لو حظى بوصالهن حظي الغداف
بالهوى ما بات لعيوني ذريف

حالة ٍ تنعاف يـ أحمد بالكساف
عن طريق اللوم فيها وتعنيف

وابق لي عون عليهن وانتصاف
لك نصيف سهامهن وأنا نصيف

وان تعذر منك يا ريف الهجاف
في صدود ما علينا به نكيف

بالعباد وكيف يقضي بـ إتلاف
حاجة ٍ بالشام .. ناس بالقطيف

فان عذرت فلا تعودنا خلاف
ما مضى والخط لا يا رد قصيف

وان بدا لك لازم غير ارتشاف
راح حم شفاه حنا ما نقيف

وانت سالم والسلام ايضاً يضاف
فرقه الترحيب من صوب الوليف