في ذكرى وفاتك ياجدتي

في مثل هذا اليوم كان رحيل اغلى انسانه في الوجود


انسانه احن وابر علي كانت من امي وابوي


كنا وانا طفل صغير نعيش مع بعض في بيت واحد


و كانت تدللني وتشتري لي كل اللي ابيه

واروح معاها لسوق الفحيحيل وسوق العباسيه

وكنت انام بحضنها تقص على من القصص اللي مازلت اذكرها ولا راح انساها


ومنها تريتره ام ترتور اللي مستحيل تلقى في بيت اي كثيري والا فضلي حرمه عجوز الا وسردت هذه القصه على احفادها


وكانت دائما تكتب فيني قصايد تخصني فيها وباسمي وترددها دائما جدام امي وابوي وعمامي وخوالي


وكبرت انا شوي واضطررنا الى ان ننفصل عن بعض في السكن بسبب مشاكل مايخلا منها اي بيت في الوطن العربي


ولكن مانسيت جدتى

وعلى الرغم من اني كنت وقتها في سن الثاني عشر الا اني كنت كل يوم اركب الباص (ايامها كانت

باصات ماعندنا سيارات) واروح لجدتي

وماانام الا بحضنها اكثر الايام


وكنت اطلع من المدرسه واروح لها


وبعد المسافه ما منعني ان امنعها انها تشوفني ..او امنع نفسي من حنانها وقربها

وكانت تعطيني كل مااجيلها دينار وكان الدينار يتكلم وقتها ويسوي شي وشيات.

الى ان كبرت وخلصت الثانويه وتزوجت

وكانت جدتي كبرت بالعمر وكانت تبي تفرح بليلة زواجي وترقص عشان تعبر


عن فرحتها فأخذت من شيلتها او بخنقها ماسوت منه ظفيره طويله عشان تقدر انها ترقص وتحرك شعرها.


ورقصت جدامي


لانها دايم كانت تقولي راح ارقص بعرسك جدامك.


حتى بعد زواجي كانت تحب عيالي

كثر حبها لي ومتعلقه فيهم لدرجه لايمكن اوصفها لكم ونفس


الدموع اللي كنت اشوفها منها ايام ماكنت اشد رحالي عشان ارجع لاهلي هي نفس الدموع اللي


قامت تودعني فيها انا وعيالي لما اجيبهم لها ويجي موعد روحتنا.

كانت تقولي مااغلا من الولد غير ولد الولد.. ودايم تردد قلبي على ولدي وقلب ولدي على الصخر..

وطبعا انا ماعرفت هالشي الا لما صار عندي عيال وشفت امي شلون تحبهم..

والحين لما صار عندي حفيد وشفت نفسي شلون انا متعلق فيه مع انه عندي بنفس البيت..واكثر الوقت اشوفه جدام عيوني..

حتى لما كبروا خواتي واخواني ا اعرفوا ان الجده مايعوض حنانها شي وان مهما غرقنا بحب امنا وابونا لكن تبقى الجده لها نكهتها الخاصه .



خصوصا لاشافتهم جوا وقامت وهي عجوز منحنيه وارفعت نفسها بالقوه وقامت تهلى وترحب وتمسك الغوري تبي هي اللي تصبلهم الشاي بايدينها من كثر فرحتها فيهم.

وتحضن عيالهم و وتحبهم وتفتح بوكها وتطلع من الفلوس وتعطيهم


وماتت جدتي العام نفس هذا اليوم..

ومات معاها باب مستحيل اقدر افتحه مره ثانيه

وقلب مستحيل اقدر القى بداله في يوم من الايام

وعيون ماراح اشوف نفسها عيون بحبها ونظراتها لي...


اللي خلاني اكتب هالكلام لما سمعت واحد من اخواني يقول لامي الله يسامج يايما ماخليتينا نشبع من جدتي..


وهذي الجمله كفيله انها اترجم لكم كمية الحزن اللي يحتفظون فيه بقلوبهم على فقدانها وهم ماشبعوا منها

ولا قعدوا معاها ولا سمعوا سوالفها ولاقصتلهم تريتره ام ترتور

ولاكحلت عيونها بشوفتهم ولاشبعت منهم

وماتت وهي تحسر على شوفتهم وجمعهتم والقعده معاهم.



اعذروني دوختكم في موضوعي وطولته عليكم


ولكن هذا تاريخ مستحيل انساه

وهو اللي هيض شجوني
وخلاني اكتب ماكتبت.ونصيحه لكم اللي عنده جد او جده

ومو ساكن معاهم بالبيت نفسه لاي ظرف كان انه مايحرمهم من شوفته لو بالاسبوع مره


ولافات الفوت ماينفع الصوت.

الله يرحمها ويرحم جميع المسلمين

كتبت وابدعت فى التعبير ياعابر

سبحانك اللهم وبحمدك ، أشهد أن لا إله إلا أنت أستغفرك وأتوب إليك

صوتك وصل يا عابر ..

والله يرحم المؤمنين جميعا الاموات منهم والاحياء

الله يرحمها ويرحم المسلمين ويسكنهم الجنه
وجزااك الله خير على النصيحه

وكم انت مبدع ياخوي عابر بسرد القصه