بعد مرور عام على وفاة الشيخ (صالح مطلق الحناكي)، جادت قريحة الشاعر/ ناصر المسيميري بهذه الأبيات:




يا الله يا للي كل الأمة برجواه

يا خير كل يخافه ويرجيه

ياللي اليا ضاقت على العبد ناداه

ما عسر إلا معه يسر يباريه

إغفر لمن تم السنة عقب فرقاه

والعين تدمع كل ما حل طاريه

عساه بالجنة مقره ومثواه

يا رب تغفر له وتجزل حسانيه

عساه من يعطى اكتابه بيمناه

في ساعة يذهل بناخٍ بناخيه

الشيخ أبومطلق إليا حل طرياه

كل يقول النعم ما هوب كافيه

إنشق عقبه شق محدن بيرفاه

يا كم نفس عقب ما راح تبكيه

لا واجملنا بالمواقف فقدناه

الله من شق على الرس يرفيه

كم من يتيم وكم رملن تحراه

وكم شايب له عادة ما يخليه

يا حر فرقا طيب الذكر حراه

ذكر يبي يبقى إلى أتلا ذراريه

لو هو رحل بقلوبنا ما نسيناه

يا كثر ما يذكر وتشكر مساعيه

عقب عيالاً ماشين بممشاه

كل على دروب المراجل موصيه

شالوا مشاله ما تناسوا وصاياه

وما مات من عقب رجالٍ تحاليه

أحد يموت ومات ذكره وطرياه

وحد له أفعالٍ مع الناس تحييه

وصلاة ربي عد وبل نثر ماه

على نبي كلنا نقتدي فيه




الشاعر/ ناصر عبدالله المسيميري