طار الكرى من بين موقي والأجفان= والعين عيّت لا تغمض مسيّـه
لاني بمتضايق ولاني بطربان=ولانـي بهايـم فـي غـرام البنيّـه
أشوفني للشعر هاليوم شفقـان =والنّفـس فيهـا للقوافـي شهيّـه
أبكتبه وأبنظمه كيف ما كـان =فينـي قصيـد ونـاوي لـه بنيّـه
سويت لي من رايب البن فنجان =حمـس الشمـال بدلّـةٍ شاذليّـه
يجلا صدى راسي ليا كنت عمسان= لاصرت متعومس يقنّـده ليّـه
ودنيت لي دفتر وحبـرٍ ودخّـان =وجلسـت بلحالـي بقـاعٍ خليّـه
وحضّرت لي من هاجس الشعر شيطان= ملعون جد وشيلته سامريّه
أنا معاه أصحاب وأكثر من إخوان= وأحيان ما أعرفه ولاني خويّـه
بالشعر متسلطن على الإنس والجان= مارد ولكن ما يحـب الأذيّـه
يجيب قيفانه على عذب الأوزان =أقـول بيـت وهـو يـردّه عليّـه
الحين توّه زان لي نظم الألحان= في بـدع قيفـانٍ تحمـل التحيّـه
سلام يـا لامٍ مطاليـق الأيمـان =أسيـاد نجـدٍ بالليالـي الخليّـه
سلام يا ربعي هل الطيب والشّان= يا أهل العلوم الطيبـات الأبيّـه
من الكويت أرسل تحيّه وعرفان= لكل لامـي منتحـي فـي نحيّـه
في كل معموره وفي كل الأوطان= أرسل سلامي له مسى وضحويّـه
لأهل القرايا والمدينة والأضعان =وأهل الشمال وأهل نجـد العذيّـه
عيال لام اللي لها المجد عنوان =أهل السموت اللـي كفوفـه نديّـه
اللي تعز الجار والضيف والعان =ويمّن بها الخايف ليـا طـب فيّـه
لخويهم ريفٍ وللضـد بركـان =و متواضعيـن لغايـة العنجهيّـه
فيهم ملامح طي من ذيك الازمان= وعاداتهـم وسلومهـم حاتميّـه
يوم الفخر مابين طعنٍ وطعّـان =ورد الظوامـي يـاردون المنيّـه
رضيعهم ما يقبل بيوم ينهـان =يمـوت والله مـا يحمـل الدّنيّـه
هم محزمي لا كشر الوقت أو شان= وهم الحيود اللي ركونه قويّـه
وهم النجوم اللي تعلت بالأكوان =وهم البـدر بالليلـه السرميديّـه
لي الشرف لاقلت في لام قيفان =بالفطـره وفينـي حمـا الجاهليّـه
ربعي ولامن قيل شهبان شهبان= أفز من أقصـاي وأسكـر حميّـه
أي والله أبي أفخر بهم كل الأحيان= ولاظن في فعلي ذنوب وخطيّـه
قلته وخلوا من زعل بات زعلان =ولاهمني أهـل النفـوس الرديّـه
لن الردي يغتاظ لامدح إنسان =ويشعر بعقدت نقـص بـه داخليـه

للشاعر : فوزان بن ناصر بن سلطان ال ناصر