يالله يامحيي العظام الرميمات=يامن عليه ارفع شكاوي حياتي
ياسامعن ذا النون وقت المنجات=ياجامع الاحباب عقب الشتاتي
ياخالقن سبع(ن)وسبع(ن)سموات=يامرسل الامطار للمدهراتي
عطاك مايحصى بكل المجالات=من قبل ادم لين تقضي الحياتي
واليوم حيثنك تجيب الدعوات=طالبك يارحمن تقبل إدعاتي
تجعل لنا سلمان رحمه ومنجات=من قصت(ن)جتنا بليا ثباتي
قصه غريبه قدرت منك ثم جات=لين اغلقو من دونا المبهماتي
رحنا ضحيه بين شخصين بالذات=ورعن خبيث وفاجر(ن)مايباتي
من يوم حقق يسهر الليل مابات=بالكذب وردنا لحوض المماتي
يوم إستلمنا يحسبنا إعصابات=وحنا إضعوفن مانعرف اللواتي
نوى يداهوينا يبا زود نجمات=نسا اليمين اللي مضاله وفاتي
ياامير ياحر(ن)سكن فالطويلات=إرحم إضعوفن ماتضوق المباتي
يحسبون الوقت ساعه وساعات=ولاواحد(ن)منهم له مسبقاتي
الظلم يفجر له إجبال(ن)ثقيلات=ماهوب ورعانن بضرب العصاتي
صخرهم الطاغي بعزم وخدعات=وجتك إعترافات(ن)بلا بيناتي
والورع زانتله جميع الوسيلات=ورط ومن دعواه يبغا النجاتي
لا خايفن ربه رمانا بنشبات=نوبن يدين الكل ونوبن براتي
ياامير دعوانا تبا صدق وإثبات=ولو فيه لجنه تظهر الغامظاتي
وإما حصل فالشرع للعبد مرضات=الشرع ادبله إرجالن عصاتي
واللا طلوعن من سجونن جويدات=واللا ترانا طالبين الصفاتي
الله مواعدنا بنار(ن)وجنات=وإن مت انا مظلوم هذي مناتي
وياامير كان ابكاك رايد عربسات=حنا لنا ناسن بكونا سنواتي
الله من حزه بكوها وحزات=ولا يشتكون اللا لمحيي النباتي
ايظن ومشاكلنا كبار وصغيرات=يشكن على اللي يرسل الممطراتي
لكن مثلك من جبالن رفيعات=مذرا لخلق الله والنايفاتي
لو القلم يذكر إفعولك ومافات =والله ليكت لين تقضي الدواتي
ماقلتها ياامير قصدي مبهات=فرقن مابين الحر وخميساتي
مثل مابين طويق وضلعان ابانات=فرقن كبير وكلها واضحاتي
ياامير ياحلال كل الصعيبات=يامعدل اهل الميل والمايلاتي
صدق كلام اللي تمثل بالابيات=مابه بيوتن إلا لها مناسباتي