|
عــــــتـــــــب
ابن العم الغالي والصحفي المعروف نصار الخمسان من أقدم معدي الصفحات الشعبية بالصحافة الكويتية ولقبوه ب (عميد الصحفيين) ويستاهل هذا اللقب فله باع طويل في هذا الشان وصفحته في جريدة الوطن ( ألوان شعبية ) مميزة ومن أبرز الصفحات الشعبية ودايما اختياراته موفقة وجميلة , لكن لي عتب عليه لانه يحط من الشعراء من شرق وغرب ويجيب القصص البدوية المشهورة ولكن ما يهتم بشعراء بني لام ولا قصصهم , فلماذا ؟
فهل هؤلاء الشعراء لا يستحقون أن ينشر لهم نصار الخمسان ؟ راكان القرناس الكثيري تركي الغريزان مهل العدوان فيصل الخمسان عبداللطيف الفضلي عبيد الكثيري عبدالعزيز الكثيري مفلح بن وسمي الكليب المغيرة رشيد الكثيري ناصر بن جفران الفضلي أحمد بن محسن آل مغيرة عبدالله السويلم الفضلي وغيرهم كثير من الشعراء المبدعين من بني لام الذين لا يحظرون على بالي الان . أرجو أن أسمع ردا مقنعا وهذا عشم ابن العم في ابن عمه واختلاف الراي لا يفسد للود قضية. |
مشكور يا أخ ليزر وان شاء الله تكون رسالتك وصلت للأخ نصار الخمسان
|
كفووو والله على هذا الموضوع المهم جدااا
انا اتفق معك جمله وتفصيلا الى متى ونحن على قاعده خيرنا لغيرنا شعراء الكثران وبني لام مفروض لهم الاولويه وشكرااااا |
العتاب بس للناس اللي لهم معزه وتقدير فقط وابن خمسان على مسمع يوم الامسيه لم يقصر
ويالله ياشعار بني لام همتكم على قول مهل اطلبو منه وابشرو بالخير |
جريدة الوطن اقوى جريده كويتية
وبفضل الله ثم ابن العم نصار الخمسان ما غابت عن تغطيت الامسيه بعكس بعض الناس الي يشتغلون بجرايد محد درى عنها وكانو يتمننون مدري على شنو الامسيه طلعت معادن كثير من الناس ويشهد ربي اني حبيت نصار الخمسان في الله من ايام الامسيه وتبين لي انه رجال فيه خير وحميا وبالنسبه للشعار ترى بعضهم طق عطيه اي كلام ومع هذا راز خشمه ويبي المعدين الكبار يترجونه علشان ينشرون له والعتب على شعراءنا ليش داسين اعمارهم ؟ مادري مستحين؟ ولا ماعندهم ثقه بقصايدهم؟ كل القبايل شعراها ينشرون بالجرايد |
ما يقصر بن خمسان
قبل فتره كان حاط بالجريده قصه بن عروج انا اشوف شعارنا مقصرين بمدح القبيله :( |
اولا احب اشكر الاخ مهل العدوان الكثيري واقوله بيض الله وجهك وبعد احب اشكر الاخ محمد بن سعد الشقيم واقوله بيض الله وجهك واحب اشكر اخوي رمح الشمال واخوي الوجيز على الرد الي مهو غريب على بني عمي ودي اضيف او ارد على الاخ ليزر واحب اشكره على الجمل الطيبه الى ذكر فيها عمي نصار الخمسان واقوله يا اخ ليزر انت او اي شخص من بني لام او اي شخص من القبايل الكريمه يقدر يدز قصيدته على البريد جريدة الوطن صفحة الوان شعبيه او انه يحضر في دايونية الخمسان في الرحاب كل يوم اثنين ويسلم قصيدته الى نصار الخمسان بيده وهذي ابرك الساعات الي يجي من بني عمي في محلانا والله ما حبيت اعلق لاني لاقيت الرد الكافي من اخواني مهل العدوان ومحمد الشقيم ورمح الشمال والوجيز وهذا العشم في بني عمي
|
اخي ليزر اشكرك على طرح هذا الموضوع وعلى حميتك لقبيلتك اخي انا ما الوم الاستاذ نصار للاسف الشديد شعرائنا يريدون من الاعلاميين طرق بابهم وترجيهم لنشر قصائدهم وانا لي سابق تجربة في هذا الامر فقد طلبة من مجموعة من شعرائنا ارسال بعض قصائدهم التي تجملهم وتجملنا معهم ليتم التنسيق معه احد الصحف والمجلات الادبية والمتخصصة بالموروث الشعبي بنشرها والى هذه اللحظة لم اجد اي شي منهم فالماذا نعتب على الاعلاميين ونقول بانهم مقصرين والتقصير منا نحن اسمحولي على الاطالة فالموضوع اثار شي بداخلي تقبلوا مروري وتقديري |
أشكر كافة الاخوة اللي ردوا على الموضوع اللي وافقني واللي ما وافقني حاولت اقتباس بعض الردود والرد عليها لكن هذا غير مسموح لاني جديد على المنتدى احب اقول للاخ (مهلالكثيري) اني معاه الف بالمية في مدحه للاخ نصار الخمسان لكن مسألة ان الشعراء هم اللي لازم يطلبون منه ينشر لهم ما اقتنعت فيها لان الصحافه هي مهنة البحث عن المتاعب والصحفي هو لازم يدور على الشي الزين وينقله للقراء والاخ ( فهد بو راشد) أقوله عسى ديوانكم دايما عامر ياولدعمي وارجوك لا تفهمني غلط وانا ماني شاعر وبيني بينك ما همني الشعر بحد ذاته كثر ما ابي يكون وسيلة دعاية للقبيلة ولا تستكثر علي لما أشره على عيال العم اللي بامكانهم يقومون بهذا الدور واعتب عليهم أشوف مهدي العجمي اكثر نشره للعجمان وناصر السبيعي مسخر المختلف للسهول والسبعان وحنا ليش غير !!! (الخيارى المغيري) كلامك صحيح انت سلطت الضوء على جانب تقصير الشعراء في نشر انتاجهم وهذا غلط منهم اكيد لكن انا مثل ما قلت مو هدفي الشعراء بحد ذاتهم انا مهتم بالقبيلة وابرازها بالوسيلة المتاحة أخيرا ارجو ان تفهمون ان المسألة ما هي انتقاد لنصار الخمسان ( بشخصه) ولكن ( بصفته) كصحفي يعني لو واحد غيره معد وصحفي من بني لام انا هم بمون عليه واشره عليه واعاتبه ( والعتب غير اللوم ترى ) على عدم ابراز اسم القبيلة لو باضيق الحدود ما دام بامكانه هذا الشيئ ارجو سماع مزيد من الاراء لمحاولة سد هذي الثغرة في القبيلة بعيدا عن اضفاء الصفة الشخصية على الموضوع . |
الى الاخ ليزر ياريت تقراء مداخلتي لك ثاني مرة انا شكرتك على الاطراء الطيب منك وشكرة الاخوان الى ماقصروا وردوا على الموضوع واللحين ابي ارد على موضوعك لان في السابق اكتفيت في رد الاخوان احب اوضح لك ان شهادتي في عمي مجروحها واحب اكون صادق معك عمي عنده الناس سواسيه الافضل يقدمه وانت قلت عميد الصحفين واذاء قارنته مع معدين شباب يبحثون عن البروز ويجتهدون بكل طاقتهم للبروز والاظهار امام قبيلتهم للتعرف والانتشار وشي طبيعي اي شاب يجتهد في عمله لي النجاح وتكوين قواعد له لكن نصار الخمسان صارله اكثر من 30 سنه وهو في مجال صفحته الوان شعبيه ومع ذالك مازال يذهب للمشاركة في جميع المحافل الشعريه ومنها على سبيل المثال شاعر المليون وقلطة الوطن وعضو رئيسي في دايونية شعراء النبط واحب اذكرك انت قلت يجيب الشعراء من شرق وغرب ومايهتم في شعراء بني لام وهذا كلام غير صحيح اذاء انت ما تتابع صفحة الوان شعبيه وترى من هم المشاركين من الشعراء انا اشاهد صفحة اللوان شعبيه وارء المشاركين من كل القبائل الكريمة ولاتنسى ملتقى بنى لام شارك فيه بكل قوته لانجاح هذا التجمع لاابناء العم واظهره في صفحته بمظهر جيد ولاتنسى جريدة الوطن من اكثر الجرائد انتشار في الكويت والخليج وهذا مو طيب بل اقل شي يعمله حق ابناء عمه بعدين لاتنسى الغياب الكبير لي بني لام اثر على ظهورهم في العلن والمشاركات في جميع المجاالات منها الشعراء والملتقيات الاجتماعيه والحمدالله بدا الحماس والظهور من جديد بفضل المنتديات في الانترنت ومنها هذا الموقع الكريم موقع الكثير وبني لام الذي اظهر بني لام للعلن بعد غياب طويل واحب ان اشكرمن هذا الموقع من جديد وانا في السابق نزلت لهم شكر في هذا المنتدى على العمل الجبار الذي صنعوه لابناء عمهم وعملوا ملتقى يفرح ويفخر كل لامي في انجازهم واخيرا يااخ ليزر انا سعيد في موضوعك والاختلاف في الراي لايفسد في الود قضيه وارد واذكر ان اي قصيده حق اي لامي اكيد نصار الخمسان راح يفرح بي قدومها ونشرها
|
| الساعة الآن 03:16 AM بتوقيت مكة المكرمة |
Powered by vBulletin® Copyright ©2000 - 2024, Jelsoft Enterprises Ltd. Designed & TranZ By Almuhajir
