اخواني السراج المنير والكثير وشاطر ..تو مانور الموضوع وحياكم الله وصدقوني من حبي للكثير

قمت ادور عن اخبارهم ...وحياكم الله

]حيالله الظلماوي..وترى ماسويت شي والعم ابو طاهر قصايده تستاهل اللي يحفظها ..

وان شالله بكمل الباقي اليوم ..وعساك شاعر مثل جدك ...يالظلماوي [/color]

هذي القصايد قيلت بمحمد بن نومان ...

البارحه قمرى ورذر غديري
محمد يابن نومان علوه نظيري..
شرب العرب ملاح وشربو غديري
فرش العرب صياح وفرشو حريري..
مكرب الصفرى ولحق المغيري
ياخوج يا...لا تولوه عدوان ..
ولا عصبو راسه ولاقيل وجعان..

وتغنى البيتين مرتين بطريقه حلوه فعلا يعني مثلا:
ورذر غديري والبارحه قمرى ورذر غديري ..وياعلوه نظيري محمد يابن نومان علوه نظيري..

القصيده الثانيه:

ياظبيات البراحه..شومن لبن نومان..
لحق الوسيد ورد بليا عهد وايمان..
وركب الربيعه الصفرى ..بليا رسن واعنان..

شفتو بليا رسن واعنان يركب فرسه..

الثالثه:

يابنت شومي لبن نومان..
جانج من البيض عشاقه..
يسلملي ساجي وابن مشعان..
اللي علي الموت دلاقه..


وساجي هو ساجي الجويد وابن مشعان هو رجاء الشقعان....


وهذي القصيده لابو وسمي ..سالم العشيران..وهويشتكي من العسكريه..

امدح روحي ..ولاامدحه بالعسكريه..
امدحه ياخوك في كف النثيري..
ذلتي من حاكمن خصم عليه..
نزل الضباط واودعهم حميري..
ربعي النبهان هم اهل الحميه..
اعتبوا اسلاح واذبحوا المديري...

والله تعبت ان شالله نكمل باجر او اليوم بالليل ..واتمنى انها تكون اعجبتكم هالمنوعات..


:rolleyes: :rolleyes: :rolleyes:

اخوي النوخذه ..وشيبانك ان شاالله..وتسلم ايدينك على هالكلام الطيب ياولد العم

وهذا اقل شي نسويه...للكثير.. منوره مشاركتك الموضوع..

الاخ كائن حي..والاخ غدى الشر نورتو بهالمشاركة وحياكم الله ياعيال العم..

اخوي كائن حي واخوي غدى الشر ..حياكم الله تامر امر ياخوى غدى الشر بس
تقصد اللي مطلعها ..قال طاهر يوم جاب العلم خالو..و الا لا علشان اكملها واكتبها اذا هي..
وياهلااااااااااااااااا...

القصه هذي اعجبتني وحبيت اني مو بس اكتفي بالقصيده لكن بقول القصه معاها

المهم كان بقيصه الغروب الله يرحمه موجود بالصفيري وضاعن نياقه كلهن ومن ظمنهن ناقه اسمها العليا وهي غاليه عليه حيل وهي من سلاله قديمه حيل المهم من حرته جا يفزع ربعه
وهم هني بالديره وهو من كثر ماهو متأثر على نياقه مرض راحوا فليفل الغروب وغصاب المسعد
وكان عند غصاب المسعد سياره وراحوا يفزعون حريفان الشقعان وهو كان بالبر يعني مو بالديره
وفعلا هم ماقصر خلى حلاله وراح معاهم والمهم ترى مو سهله لانهم راح يدخلون الحدود يعني تهريب والعسكر على طول دورياتهم تفتر على شان جذي كان يمشون بالليل والليتات مسكره
والعم بو سمري هو اللي يدل فكان هو اللي يسوق وخذو لهم يوم بليله وهم يدورون
لانه بو سمري كان متأكد انهم راح يلقونه هناك لان فيه عوايل هناك تاخذ الحلال اللي ضايع
وتظمه لحلالهم..
المهم وصلو بليل ..ابو سمري كان مسوي معروف قبل سنه لواحد اسجنوه العسكر بالمطلاع وكان صغير وماله احد وانسجن مع مجموعه طلعوا هالمجموعه الا هو لان ماله احد وابو سمري كان جاي بالصدفه ولقى خال هالولد يبجي وهو مايعرفه لكن ماقصر وكلم العسكر وطلعوه اسم الولد جبار العويلي..
نكمل قصتنا الاولى وراح تعرفون ليش قلت الثانيه الحين ..
مثل ماقلت وصلو بليل ويشوفون جدامهم بيوت شعر بس مابغوا يجونهم لان فيه خطر عليهم
نزل بوسمري يصلي ونزل العم غصاب والعم فليفل نزلو من السياره معاه والا يجيهم واحد
شافهم من اهل هالبيوت وقرب منهم وكانت عينه على العم بوسمري وسألهم قال هذا حريفان
الشقعان قالوا ايه ويروح لاهله بسرعه وتجي امه معاها اهل هالبيوت وهن يهللهلن
وقامت تحب ايدين بو سمري وتدعيله طلع هالولد هو جبار اللي طلعه بوسمري والله وماقصر ضيفهم وذبح لهم ويوم خلصو عشى سأل ابو سمري ليش جايين قاله السالفه وقاله جبار انت لك من النياق شي قال لا انا جاي فزاع ورد عليه الولد وانت من اهلها ياعم بوسمري وطلب ياخذ معاه راعي الحلا ل وهو فليفل وراح لناس منهم يدري ان الحلال عندهم وطلبهم وقالهم انه
لازم يعطونه نياقه لان مايقدر يرده وهو من طرف ابوسمري وفعلا عطوه الحلال وردو فيه
بفضل الله ..ماشالله على اهلنا قبل صج ناس قلوبها على بعض ..

فقال فليفل هالقصيده ببو سمري لانه فزع لهم وخلى حلاله:

ياشوق من تردع اشفيه..
ياخالنا ماتناسانا..
حريفان ياشوق نشميه..
خلى شياهو وبدانا..
الجيب يشر على الميه ..
ربي عن العوق تاقانا..
بكرتك عند العويليه..
جبناه والرب جدانا..
ياليت من كز برقيه..
للشايب اللي ترجانا..
وفيه قصيده ثانيه هم للعم بوسمري قايلها العم بو مطلق لنفس الموضوع ..

وحياكم الله ويارب ماكون طولت عليكم بس اعجبتني القصه فحبيت اذكرها..