من الكويت أرسـل تحيّـه وعرفـان= لكـل لامـي منتحـي فـي نحـيّـه
في كل معموره وفـي كـل الأوطـان=أرسل سلامي لـه مسـى وضحويّـه
لأهل القرايـا والمدينـة والأضعـان=وأهل الشمـال وأهـل نجـد العذيّـه
عيال لام اللـي لهـا المجـد عنـوان=أهل السمـوت اللـي كفوفـه نديّـه
اللي تعز الجـار والضيـف والعـان=ويمّن بها الخايـف ليـا طـب فيّـه
لخويهـم ريـفٍ وللـضـد بـركـان=و متواضعيـن لغـايـة العنجهـيّـه
فيهم ملامح طي مـن ذيـك الازمـان=وعاداتـهـم وسلومـهـم حاتمـيّـه
يوم الفخـر مابيـن طعـنٍ وطعّـان=ورد الظوامـي يــاردون المنـيّـه
رضيعهـم مـا يقبـل بيـوم ينهـان=يمـوت والله مـا يحـمـل الدّنـيّـه
هم محزمي لا كشر الوقـت أو شـان=وهـم الحيـود اللـي ركونـه قويّـه
وهم النجـوم اللـي تعلـت بالأكـوان=وهـم البـدر بالليلـه السرمديّـه
لي الشـرف لاقلـت فـي لام قيفـان=بالفطـره وفينـي حمـا الجاهلـيّـه
ربعي ولامن قيـل شهبـان شهبـان=أفـز مـن أقصـاي وأسكـر حميّـه
أي والله أبي أفخر بهم كـل الأحيـان=ولاظن فـي فعلـي ذنـوب وخطيّـه
قلته وخلوا من زعـل بـات زعـلان=ولاهمنـي أهـل النفـوس الـرديّـه
لن الـردي يغتـاظ لامـدح إنسـان=ويشعر بعقـدت نقـص بـه داخليـه

## يعطيك العافية على نقل هالقصيدة الرائعة ##