المساعد الشخصي الرقمي

مشاهدة النسخة كاملة : الشمري واليامي


المظهري اللامي
16-09-2008, 06:19 AM
" سلام يا يام " قصيدة للشاعر / عبدالرحمن بن سعدي العبدي الشمري



أقول الحمد لله ما علت فـي أرضنـا أعـلام
وعد رمالهـا وأعـداد مـا هلـت سحايبهـا
سلامي عد ما حج الحجيج وكبـروا باحـرام
سلامي كل مـا شـدّت لبيـت الله ركايبهـا
سلامي عد من زكى زكاته ثـم صـام وقـام
سلامي من مشارق أرضنـا حتـى مغاربهـا
سلامي عد ما نكتب على وجه الورق بأقـلام
سلامي مالنخيـل أهتـز والنسمـة تلاعبهـا
سلامي عد ماالبلبل يغنـي بالغصـون أنغـام
سلامي كلمـا عيـنٍ تمنـت شـوف غايبهـا
سلامي كلما مالت غصون وحركتهـا أنسـام
سلامي من حدود الجوف ومن حايل وحتى أبها
سلامي كلما اشتاق المحب لمن يحـب وهـام
سلامي عد ما التمّـت بعـد غيبـه حبايبهـا
سلامي ياهل الطولات يا درع العرب يا يـام
رجالٍ ما أحد يزحـم علـى العليـا مناكبهـا
رسوا مثل الجبال الراسيات إن زلـت الأقـدام
وكما البركان إذا نادى المنادي فـي كتايبهـا
إذا طير المنايا فـوق هامـات النشامـا حـام
أشوف سيوفهم تلمـع كمـا تلمـع كواكبهـا
وإذا ماقام سوق الموت يوم المعركة يـا قـام
أشوف نفوسهم يكثر بسـوق المـوت جالبهـا
يعشون السباع الجايعه روس الشيوخ اطعـام
وطيور السمـا أسيـاف يـامٍ مـن مخالبهـا
لهم رايٍ مصيب ما يحير إن حارت الأفهـام
ولهم من طيبهم فزعات تذهـل مـن يجربهـا
إذا لانوا فهم أبرد وألطف مـن نسيـم الشـام
وإذا اشتدوا فهم زلزال يزلزل مـن يغاضبهـا
سلمتوا يا سيوف الهند ومضربها يقص الهـام
وسم الموت بحدود السيوف وفـي مضاربهـا
يا ويل اللي نوى حرب الأسود وغرّته أوهـام
أنا أشهد ما اهتنى بالنـوم مجنـون يحاربهـا
الأفعى من يجيها إن بـدت بأنيابهـا الأسقـام
ولهيب النار من يصبر على حامـي لهايبهـا
أشوف الطفل فيهم يا نشا كالليث كالضرغـام
وكما همدان إذا شبّ الشباب وشـاب شايبهـا
هم الملجا هم الملفا لمن هـو يشكـي الأيـام
وهم المزبان يا ضاقت على الخايف جنايبهـا
كرام نفوس أهل ناموس عزّ اللي شكا وأنضام
كما أمواج البحر يا يام إذا اشتـدت مصايبهـا
كرام ومن كرام وضيفهم مـا يعـدم الإكـرام
كأن أموالهم ما هـي لهـم إن حـل طالبهـا
هم أرحم بالخوي وأكرم من الوالد على الأيتام
وأنا أشهد من يجاور يام ما يشكـي متاعبهـا
إذا كان السنـة فيهـا ليالـي تختلـف وأيـام
بني يام الليالي البيض وهو بـه مـن يكذبهـا
سهرتوا وانتهضتوا للمراجل والعفـون نيـام
وأظن اللي يبي الطولات ما يرخص مطالبهـا
دروب المرجله والطيب ما تاتيـك بالأحـلام
إذا مـا خالـط الأقـوال أفعـالٍ تصاحبهـا
لبعضهم من بعضهم دوم عصابة راسهم وحزام
ذيابـة قاتليـن للجبـان إن جـاء محاربهـا
أنا شاعر على كيفي ببحـور الشعـر عـوام
دواليـب الفكـر تاتـي علـى كيفـي أقلبهـا
أنا أحفظ قصيدي عن هزيل القول والأوهـام
وجـزال المعانـي للنشامـا مـا نحسَّبـهـا
أنا من دار حاتم جيت وأظن الشعر ما ينـلام
إذا ما قد تغنّى في هـوى (نجـران) كاتبهـا
جميل الشعر وأعذب شي شعرٍ صادق الإلهـام
فلا تصدق بقولـة أعـذب الأبيـات أكذبهـا
أجل عشنا وشفنا ومن يعيش يجـرب الأيـام
تسقيه الشقـا والهـم مـن قاسـي تجاربهـا
أنا من نجد جيت وخاطري تلعـب بـه الآلام
ونسيت الهم في بنت الجنوب ومـن يقاربهـا
أنا من دار حايل (شمري) ولي الفخر يا يـام
إذا فـي مثلكـم سطـرت أبياتـي وأرتبهـا
شمر والذيابه يـام ركـن وللفخـر مرسـام
فلا الأبيات والأمثال تحصـي لـك مناقبهـا
وختام القول صلى الله على من ناصر الإسلام
رسول الله شفيع الناس في زحمـة محاسبهـا



ورد الشاعر / سعد بن مهدي بن صياد بن فجيحه ال فطيح اليامي
عليه بهذه الرائعه




جفت عيني لذيذ النوم والمشتـاق كيـف ينـام
جهت برق الشمال اللـي هواجيسـي يجاذبهـا
يا حيك يالعبير اللي الى نسنـس بشكـل عـام
نعش روح الموده والوفاء بالنفـس واطربهـا
ويا حيك يالقصيد اللي الى ذاعت بـه الاعـلأم
عنت له روس قوم وزرفلت صوبـه ركايبهـا
ويا حي الله بأهل حايل وشمرعـن قبيلـة يـام
هل الطنيه مدلهـة الغريـب الـي يصاحبهـا
واهل شعب السرايا والعزوم ان رفرفت الاعلام
لمنها سبلـت ثـم ارعـدت وارخـت ذوايبهـا
سواياهم سوايا اللي في الشجاعه والكرم حكـام
صعيبـات مراسيهـا نزيـهـات مشاربـهـا
اهل هيبه ومجـد ومكرمـات وفـارس مقـدام
قريبيـن ٍبعيديـن ٍ عـن الهزلـه وصاحبهـا
ولدهم لي كبر يفطر على الجزله لمنـه صـام
يجي رمـز لغيـره لـو مـع قـوم يناصبهـا
على عز وشرف خيالهم في كبريـاء لـي زام
بطش بديـار قـوم ضاربـه تفتـل شواربهـا
لهم في الموجبه ذكر ولهم في النايبـه زرجـام
أسـود ضاريـات فاريـات فـي مضاربهـا
ابو خوذه وابـو لله وابـو مـن جنـن الازلام
وابو تردون عـروى كلهـم منصـا ركايبهـا
مخابيط الجنأيز وردة المـاء عـزوة المنظـام
بعد حـي الكـرم والعـرف مفنيـة محاربهـا
طلاقي من حزامي في غلاهم مـا حـد ينـلام
سوالفهـم مـع سبـع القبايـل مـن عجايبهـا
ومحبتهـم دليـل للكمـال وبغضهـم هــدام
اسير في غلاهـا مـن تبخـس فـي مذاهبهـا
غلا "عبده ""وسنجاره" كما الماء للنفوس الـزام
ولا أعلى في شمال الكون كلـه مـن مناسبهـا
هلا والله هلا يالعبدي الـي يفتخـر فـي يـام
ويبلغهـا تحياتـه مـن السـاحـل ويكتبـهـا
هلا باللي بالانترنت وصلنا العلم منـه شمـام
امنصينا جزيـل القـاف والجـزلات جايبهـا
هلا والله يابو سعـدي ويكـرم لأجلـه الدمـام
ويسمـو بالوسايـط كلهـا لأعلـى مراتبـهـا
ولو ما نذكر انه جاه من ماجوبـه أيـش ٍ تـام
كرم ذاتـه يكمـل مـا قصـر منـا لواجبهـا
ولكن طيب التربـه قليـل الغيـث لـه زمـام
يجي روضة خضر لو ما سقتـه الا جوانبهـا
الا يا مرحبا ما لاح برقـه وانكشـف واللتـام
وما هلـت بوبلـه واسبلـت جـزل سكايبهـا
والا يا مرحبا ممسـك بمزدلفـه لهـا تمتـام
حجيج البيت والتمت بخيـف بفضـل واهبهـا
ومن ضحى ومن زكى ومن صلى وحج وصام
وعدد من طاف بالكعبه ولجـت لـه محاربهـا
والا يامرحبا بك عن قبيله يام يـا الضرغـام
نيابة عـن رجـال ارسلـت صوبـي ندايبهـا
اتوصيني عليك بجزل رد القاف ربـع حشـام
وانا شفق على رد البيوت اللـي سمعـت أبهـا
هلا والله هلا مليون واكثـر والركـاب قيـام
نيابة عـن بنـي عـم نوفـي فـي وجايبهـا
الا يا مرحبا بك يا ولـد شمـر وعرفـك دام
معرفتنـا معـك للفخـر والطـولات ننسبهـا
ولو الوقت شـح بهـا ولـح وسيـر الاقـدام
وهـذه عـادة الايــام شتـاتـه شعايبـهـا
واملنا لا يزال تزورنـا فـي المقبـلات ولام
مواجيبك علينـا يـا سليـل المجـد ننصبهـا
ابيوت من حجر بقلوبنا تثبـت ماهـي بخيـام
مع الايام صلف الريـح مـا يقـدر يقضبهـا
على ربي تجـي وتزورنـا والله هـو العـلام
بمـا تعتـز بـه ويعـز بنفـوس تخاطبـهـا
ترى حقـك علينـا لا يـزال وننتظـر مقـدام
مراكيبـك اتسيـر صوبنـا والكـل يرقبـهـا
نبادلك الوفاء والا يجـي لـك واجـب لـزام
نشـارك فيـه والا وقفـه منـا نقـوم بـهـا
على قول المثل بين الرجال ادنى الجميل ازمـام
يقـرب لـك أرجـال الوفـاء معهـا يقربهـا
اقولـه بالأصالـه والنيابـه عـن قبيلـة يـام
وصلاة الله على طه اطهر اهل الأرض واطيبها

مفلح الكثيري
16-09-2008, 08:49 PM
يـعطيكـ الف عافيــة

وصــح لسان الشاعرين

*ن*ب*ض*
16-09-2008, 11:53 PM
سلامي كلمـا عيـنٍ تمنـت شـوف غايبهـا ..<<

جفت عيني لذيذ النوم والمشتـاق كيـف ينـام
جهت برق الشمال اللـي هواجيسـي يجاذبهـا ..<<

اشهد انها قصايد جزلة .. لا هانو الشعار ولا هنت يا بو محمد على النقل الرائع :)

راعي المجاهيم
17-09-2008, 02:46 AM
ابو محمد

تسلم اناملك على هذا النقل الجميل

وصح الله لسان الشاعران

ونعم في قبيلة شمر ويام

سلطان علي الكثيري
21-09-2008, 06:05 AM
الله يعطيك العافية يابو محمد

المظهري اللامي
24-09-2008, 07:09 AM
سعدة كثيرا بمروركم

ابو فارس
09-10-2008, 04:49 PM
ونعم بالشاعر عبدالرحمن بن سعدي العبدي الشمري وبشاعركم من بني لام سعد بن مهدي بن صياد بن فجيحه ال فطيح اليامي؟
ويعطيك العافية علي الطرح الطيب

المظهري اللامي
30-03-2009, 12:59 AM
حي الله ابو فارس

تعديل لـ سموك لو سمحت الشاعر يامي وليس لامي

ودمت

الحر الاشقر
28-07-2010, 12:12 AM
الله يعطيك العافيه

خالد بن عطا الله
28-07-2010, 12:26 AM
يعطيك العافيه يابو محمد

صقر بن عدوان
28-07-2010, 06:04 AM
صح لسان الشعار وتسلم يمين سموك يالقرم